وسط زحمة إصدارات 2025، طلعت علينا لعبة Blades of Fire من تطوير Mercury Steam، نفس الأستوديو اللي قدملنا سلسلة Castlevania: Lords of Shadow. توقعنا لعبة Hack and Slash بسيطة، ولكن المفاجأة إنها لعبة أعمق من المتوقع على كل المستويات، بداية من الكومبات لحد تصميم العالم ونظام التصنيع المعقد للأسلحة.

• قصة اللعبة:

أحداث اللعبة بتدور في عالم خيالي بتحكمه ملكة كانت عادلة قبل ما يتحكم فيها سحر غامض وتنقلب على شعبها. بنلعب بشخصية Aran، صانع أسلحة موهوب بيتورط في مغامرة كبيرة لما بيستلم مطرقة أسطورية من شخصية غامضة اسمها Adso، واللي بيكون رفيقك في الرحلة.
من هنا بتبدأ المغامرة: رحلة طويلة بتجمع بين اكتشاف أسرار العالم ومحاولة هزيمة الملكة، وبتقابل فيها شخصيات جانبية مهمة، بوصات ضخمة، ومخلوقات سحرية مرعبة. العلاقة بين Aran وAdso بتتطور بشكل شبه للي شفناه في GOW، وده بيضيف بعد إنساني لطيف وسط الأكشن.

• أسلوب اللعب: عالم مفتوح ومغامرة ممتعة

اللعبة بتعتمد على استكشاف مناطق ضخمة ومترابطة، مليانة ألغاز، عناصر بيئية، وأعداء اختياريين. شبه كبير بألعاب السولز، خصوصًا في فكرة النقاط المركزية اللي بترتاح فيها أو بتعمل منها Fast Travel، وفقدان السلاح عند الموت واسترجاعه من مكان الوفاة.
الاستكشاف متكامل مع نظام Crafting غني ومعقد. كل منطقة فيها أسرار وأبواب ما تتفتحش غير لما تحل ألغاز أو ترجع بعد تطوير أدواتك، وده بيشجعك ترجع وتعيد استكشاف نفس الأماكن بعيون مختلفة.



• نظام التصنيع: قلب التجربة

نظام التصنيع هو البطل الحقيقي هنا. كل سلاح ممكن تصنعه بعدة طرق تؤثر بشكل مباشر على القوة، الوزن، نوع الضرر، وحتى طريقة الصد في المعركة. عندك حرية كاملة في اختيار:

- شكل وطول النصل
- السبيكة أو الخليط المستخدم
- نوع المقبض وطوله
- الخشب والتفاصيل الزخرفية

وفيه Mini Game لعملية التصنيع بتحاكي تجربة الحدادة نفسها! لو أتقنتها، تقدر تنتج أسلحة أعلى جودة وتقلل عدد مرات الصيانة.
النظام ده بيخلي كل سلاح تحس إنك صنعته بنفسك، وترتبط بيه، وبتفكر فعليًا قبل كل مواجهة: "هو السلاح ده مناسب للعدو اللي قدامي؟".



• الكومبات: تكتيكي ومليء بالعمق

الكومبات مستوحى من ألعاب السولز لكن بإضافات جديدة. كل زر من أزرار التحكم الأربعة مخصص لضربة من اتجاه مختلف، وتقدر تشحن أي ضربة لهجوم أقوى. تقدر تعمل Chain Attacks وكومبوهات متنوعة حسب نوع السلاح.
اختيار السلاح المناسب لكل موقف مش رفاهية، ده ضرورة. كل خصم محتاج منك تركيز، تمركز، وتكتيك – مفيش مكان للـButton Mashing. البوصات بتقدم تحدي كويس، والمعارك دايمًا فيها جرعة إثارة عالية.
العيب الوحيد الواضح هنا هو ضعف الـAnimations ومؤثرات الجرافيكس أثناء المعارك. مش بنفس مستوى الصناعة الحديثة، وده ممكن يخلي البعض يظن اللعبة قديمة من شكلها، رغم عمق الميكانيكيات.



• الرسوم والأداء: PS4 Remaster بجيل جديد؟

على مستوى الرسوم، اللعبة بتظهر كأنها من جيل PS4 ولكن بتشتغل بدقة 4K وسلاسة 60 فريم على PS5. صحيح التفاصيل التقنية مش مبهرة، لكن الـArt Style المميز المستوحى من GOW وDarksiders مع لمسة Fable بيخلي المشاهد ممتعة بصريًا.

• الأصوات والموسيقى: مستوى جيد ولكن...

الأداء الصوتي كان جيد جدًا، خصوصًا للشخصيات الرئيسية. الأصوات المحيطية كانت غنية ومليانة تفاصيل، لكن الموسيقى كانت متفاوتة – في بعض الـTracks المميزة، لكن ماكانش فيه تراك يعلق في الدماغ.



• الخلاصة – هل تستحق التجربة؟

Blades of Fire هي مفاجأة حقيقية. لعبة بتقدم فكرة مختلفة تمامًا عن المعتاد، خصوصًا في نظام التصنيع العميق اللي بيربطك فعليًا بأسلحتك. في نفس الوقت، عندها عيوب واضحة زي الرسوم القديمة وبعض التشابهات في القصة مع ألعاب تانية.
لكن طالما بتدور على تجربة Action RPG جديدة، فيها عمق وتحدي، فدي لعبة تستحق التجربة.



• التقييم النهائي: 7.5/10

تجربة جيدة جدًا وسط سوق مليان تكرار، ونتمنى نشوف ألعاب تانية بنفس الجرأة في تقديم أفكار مختلفة.