هل من حقك تفضل تلعب لعبة اشتريتها حتى بعد ما المطور يقرر يقفل سيرفراتها؟

السؤال ده مش مجرد جدل عادي، لكنه المرة دي قلب الدنيا فعلاً بعد ما أعلنوا إن لعبة Anthem، اللي طورتها شركة BioWare ونشرتها EA، هيتقفل سيرفراتها بشكل نهائي في يناير 2026.

الخبر نزل زي الصدمة على جزء من جمهور اللعبة، واللي رغم إن اللعبة ماكنتش من أنجح التجارب اللي نزلت في الجيل اللي فات، إلا إن في عدد من الجيمرز شايفين إنهم مش بيطالبوا بـ"إنقاذ" اللعبة علشان حبهم ليها، لكن علشان مبدأ مهم جدًا في صناعة الألعاب:
"أي لاعب دفع فلوس في لعبة، المفروض يفضل يقدر يلعبها بأي شكل، حتى لو بعد ما السيرفرات تقفلت."

ليه الناس بتطالب بإنقاذ لعبة Anthem؟

اللي حصل إن ناس كتير من اللي لسه عندهم اللعبة، سواء النسخة الرقمية أو نسخة الأقراص، ابتدوا حملة بيطالبوا فيها شركة EA إنها تضيف طور أوفلاين يخلي اللعبة قابلة للتجربة بدون اتصال بالسيرفرات.

الفكرة هنا مش إنهم شايفين Anthem لعبة عظيمة، بالعكس، كتير من الجيمرز اتفقوا إنها تجربة كانت فيها مشاكل كتير وقت الإطلاق، وفشلت في تحقيق الوعود اللي اتقالت عنها قبل ما تنزل.
لكن اللي بيطالبوا بيه دلوقتي مش ترميم للعبة ولا محتوى جديد، هم ببساطة عايزين يقدروا يفتحوها ويجربوها حتى لو مجرد استكشاف للعالم بتاعها أو تجربة أساسية من غير سيرفرات.

المطلب بسيط:
"ضيفوا طور أوفلاين.. مش عايزين سيرفرات ولا أونلاين، بس عايزين نقدر نلعبها بعد 2026."

احترام حق اللاعب بعد الشراء

اللي بيقوده الحملة شايفين إن ده مش بس طلب عاطفي، لكنه تصرف لازم أي مطور أو ناشر يعمله من باب احترام اللاعب.
الناس دي دفعت فلوس، وامتلكت اللعبة سواء على منصة PS4، Xbox أو PC، والمفروض إن التجربة تفضل متاحة حتى بعد نهاية الدعم.

وطبعًا فيه أمثلة شافوها بتدعم طلبهم، زي لعبة Suicide Squad: Kill the Justice League، واللي بعد ما فشلت تجاريًا وقرروا يقفلوا سيرفراتها، نزلوا تحديث بيضيف طور أوفلاين يسمح للاعبين يفضلوا يلعبوها حتى بعد ما اللعبة تخرج من الخدمة تمامًا.

نفس السيناريو ده بيطالبوا بيه في Anthem:
مش لازم تعدلوا ولا تطوروا اللعبة، بس خلوها قابلة للفتح والتجربة في المستقبل.

المشكلة الأكبر: اختفاء الألعاب

اللي بيخلي الموضوع أكبر من مجرد "Anthem"، هو إننا بقينا نشوف ألعاب كتير بتختفي بالكامل لما سيرفراتها بتتقفل.
ألعاب زي Babylon’s Fall، Knockout City، وMarvel’s Avengers كلها تم الإعلان عن نهايتها، ومفيش وسيلة حقيقية للاعب إنه يعيش التجربة تاني، حتى لو عنده اللعبة على جهازه.

ده بيفتح باب واسع للنقاش حوالين "الملكية الرقمية" في الألعاب، وهل اللي بنشتريه فعلاً ملك لينا؟ ولا إحنا بنستأجر اللعبة طول ما السيرفرات شغالة؟

حملة Anthem: مجرد بداية؟

سواء كنت بتحب Anthem أو لا، الحملة دي بتطرح نقطة مهمة لكل مجتمع اللاعبين:
هل المفروض الشركات تلتزم بإتاحة تجربة أوفلاين قبل إغلاق السيرفرات؟
هل ده جزء من "حق اللاعب"؟ ولا مجرد رفاهية صعبة التطبيق؟

اللي واضح إن عدد الجيمرز اللي بيطالبوا بالحق ده بيزيد، وكل مرة بتتقفل فيها لعبة أونلاين، بنسمع نفس المطالب.

ويمكن النهارده هي Anthem...
بس بكرة ممكن تكون لعبتك المفضلة هي اللي على وشك تختفي.