التقارير الجديدة اللي خرجت من تسريبات عرض داخلي تابع لـAMD في 2023، فجّرت مفاجآت كبيرة عن مستقبل أجهزة بلايستيشن، سواء النسخة الرئيسية “Orion” أو المحمولة “Canis”. ويبدو إن سوني داخلة بقوة في السباق الجديد بأفكار مختلفة، مع التركيز على الكفاءة والتقنيات المتطورة بدل ما يكون التركيز كله على القوة الخام بس.

PS6 – أداء خيالي بكفاءة أعلى

بداية من الجهاز الرئيسي "Orion"، اللي هيمثل الجيل السادس من بلايستيشن، سوني قررت تغير الاستراتيجية شويّة. بدل ما يكون استهلاك الطاقة عالي زي ما شفنا في بعض الإصدارات السابقة، الجهاز ده بيستهدف معدل طاقة أقل، حوالي 160 واط بس، يعني أهدى من PS5 الحالي. وده ممكن يخلي الجهاز أهدى في الصوت، أقل حرارة، وفي نفس الوقت محافظ على أداء قوي جدًا.

الجهاز هيكون مبني على تصميم chiplet، وهي تقنية حديثة بتقسّم مكونات المعالجة على أكتر من وحدة، مما بيخلي الأداء متوازن وفعال. المعالج المركزي هيحتوي على 8 أنوية من نوع Zen 6، وده معناه سرعة كبيرة واستجابة أسرع. أمّا كارت الشاشة فهيستخدم معمارية RDNA 5، اللي متوقع تحقق قفزة في الأداء مقارنة بـPS5 Pro، رغم إن عدد وحدات المعالجة الرسومية هيكون أقل (40 لـ48 مقارنة بـ60 في PS5 Pro)، إلا إن سرعتهم الأعلى ومعمارية RDNA 5 اللي بتحسّن الـIPC، بتخلي الأداء في المجمل أقوى.

الكلام بيقول إن الجهاز هيقدم أداء في الرسومات أفضل بـ3 مرات من PS5، ومرتين تقريبًا من PS5 Pro. أما في تتبع الأشعة (Ray Tracing)، فالمكاسب خرافية، وممكن توصل لتحسين يتراوح ما بين 6 لـ10 أضعاف.

Canis – جهاز محمول بقدرات بلايستيشن حقيقية!

أما بالنسبة للجهاز المحمول "Canis"، فده محاولة واضحة من سوني لمنافسة سوق الأجهزة المحمولة بشكل جدي، بس من غير التنازل عن قوة الأداء. الجهاز هيكون مبني على شريحة 3 نانومتر صغيرة الحجم، وده بيسمح بإستهلاك طاقة أقل وأداء أفضل.

المعالج فيه 4 أنوية من نوع Zen 6C، ومعاه من 12 لـ20 وحدة RDNA 5 للرسوميات. السرعات المتوقعة للأنوية الرسومية هتتراوح ما بين 1.6 لـ2.2GHz. كل ده بيترجم لأداء يقارب نص قوة PS5 من حيث الـrasterization، بس تتبع الأشعة هيكون أفضل بشكل ملحوظ عن أي جهاز محمول تاني.

المميز كمان إن الجهاز هييجي بباقة مميزات تخلي تجربة اللعب متنقلة ومتكاملة:

• شاشة لمس كبيرة

• اهتزاز ديناميكي (Haptic Feedback)

• مايك مزدوج للتفاعل أو الشات

• دعم لتخزين خارجي microSD وM.2 SSD

• شحن سريع من خلال USB‑C

• دعم تشغيل ألعاب PS4 وPS5

يعني فعليًا بتحصل على تجربة شبه كاملة لجهاز كونسول… بس في إيدك!

موعد الإطلاق والتسعير المتوقع

حسب التسريبات، مرحلة الإنتاج هتبدأ في منتصف سنة 2027، على ما يتم تحضير خطوط التصنيع وتجهيز كل المكونات. الإطلاق الرسمي في السوق غالبًا هيكون في آخر 2027 أو بداية 2028.

أما بخصوص الأسعار:

• جهاز PS6 الأساسي متوقع يكون بسعر حوالي 499 دولار

• جهاز Canis المحمول هيكون ما بين 400 لـ500 دولار

أسعار تعتبر معقولة نسبيًا بالنظر للتقنيات اللي بيقدموها.