النهارده هندردش معاكم في شويه تفاصيل مهمه جداً عن لعبة السولز والأكشن المُنتظره Wo Long Fallen Dynasty قبل ما تبدأوها ... يلا بينا.

اللعبة فيها شبه كبير جداً من معظم ألعاب السولز خصوصاً Sekiro وبتديك حرية الأختيار بين 5 فئات مختلفه وأنت بتعمل الشخصية في بداية اللعبة و كل شخصيه بيكون ليها طريقه ومزايا معينة في أسلوب القتال الخاص بيها ومزايا وعيوب من حيث الهجوم والدفاع ووحش خاص بيك قوته مشابهه لقواك حسب الفئه بتاعتك.

النقطه دي للي لعبوا Sekiro قبل كدا وهي نظام "Spirit Emblem" أو زي ما بنسميه كدا "مقياس الروح" شبيه جداً بلعبه السولز المحبوبه Sekiro مع بعض الفروق البسيطه، وتقدر تستخدم الطاقة الإيجابية لمقياس الروح عشان تستدعي الوحوش، لكن لو دخلت في المستوى السلبي للطاقة الروحية توازنك هيختل تماماً.

مفيش درع يحميك من ضربات الأعداء زي ما متعودين في العاب تانيه مشهوره "Dark Souls" و "Demons Souls", لكن تقدر تصد الضربات بأستخدام سلاحك لحمايتك من الضرر بقدر المستطاع، وأعتمادك الأكبر هيكون على آلية التصدي وعكس الأضرار على الخصوم والهجوم بعدها مباشره المعروفين بالـ Parry و Riposte.

أتكلمنا عن إن هيكون في وحش معاك طول رحلتك علي حسب الـ "Class" أو الفئه اللي أختارتها، و بتقدر تغيير نوع الوحش في كل نقطة تكملة أو Checkpoint المعروفه في اللعبة بأسم “Battle Flag”، وقدراته التدميرية هتساعدك في القضاء على الأعداء، وهيكون ليك الأفضليه في القتال، أو تحسينات لسلاحك وغيرها مميزات تانيه كتير.

من الأضافات الجديده في اللعبه إن كل اللاعبين و الأعداء هيكون عندهم حاجه أسمها المستوى المعنوي, ودا ممكن أن يزيد أو يقل علي حسب التفادي ناجح ولا لاء والضرر الذي يتعرض له العدو، وبيزيد أكتر لما تهزم عدو معين وينقص أكنر لما تموت، وبشكل عام كل ما مستوى المعنويات عندك أو عند عدو معين يزيد هيزيد معاها قوه التحمل.

صعوبة معارك الزعماء هتقيس مستوي تحملك وصبرك كسولز جيمر وإتقانك لها، لأن كل زعيم ليه مرحلتين، والمرحله الثانية هي الأصعب لأن الزعيم هيظهرلك كل ما عنده من الحيل والحركات والقدرات عشان يهزمك، وعاوز أقولك نصيحه برضو, في مواجهات لازم متغلطش فيها خالص حتى لو حركه واحده، لأنك ساعتها هتموت وتعيد تاني.

خرائط، اللعبه مش هتكون متصله ببعض لكن هتقدر تحدد المهمات من القائمة الرئيسية قبل ماتبدأ تلعب خالص زي نفس طريقه سلسلة العاب السولز المشهوره Nioh، حيث إن كل خريطة عبارة عن ساحات فيها أنواع مختلفه من الأعداء والوحوش و صناديق الكنوز المخفية لأضافه طابع الأستكشاف في اللعبه مع بعض المسارات الجانبيه.

هيتم أضافه نمط اللعب التنافسي أو PvP ودا هيسمح للاعبين بالتنافس والقتال ضد بعضهم بأستخدام الأسلحة والقدرات والسحر لكن الاعتماد الكبير هيكون على النمط التعاوني، اللي هيسمح للاعبين بأستدعاء أصدقائهم وتجربة اللعبه، وإنهاء المهمات والتحديات المختلفه والمساعده في القضاء علي الزعماء والوحوش الموجودين في اللعبه.

اللعبة بتتميز كمان بوجود مجموعه متنوعة من الأسلحة، بدايه من أسلحه المدي القريب زي العصي والرماح و السيوف والفؤوس وصولاً الي الأسلحة بعيدة المدى زي الأقواس النشابة والسكاكين التي يمكنك رميها ، وكل سلاح ليه هجمات خاصه ببه، وممكن تلعب بسلاحين مختلفين في وقت واحد أوالتبديل بينهم بسهولة بنفس أسلوب سلسلة العاب Nioh.

وفي النهايه هناخد بالنا ان اللعبه متأثره بشكل كبير بألعاب سولز سابقه أهمهم Sekiro و Nioh ونتمني أنها تقدم أداء أعلي منهم أو مساوي ليهم.